Градот Загреб ќе увезе 100.000 стерилни машки комарци од Италија и ќе ги пушти во лет за да се спаси од наездата на тигрести комарци која го очекува регионот ова влажно лето, пишува Индекс. Големата бројка од 100.000 службите ја објаснуваат на следниот начин:
– Ако тие се побројни, ќе ги оплодат женките, кои потоа ќе произведат јајца кои нема да доведат до потомство и на овој начин биолошки би го намалиле бројот на тигрести комарци присутни во една област – опишала Ана Клобучар од Научниот завод за јавно здравство „Др. Андрија Штампар“.
Градовите ширум Хрватска ја започнуваат борбата со комарците. За таа цел одвоени се 384.000 евра.
Дел од овие средства се наменети и за едукација на граѓаните.
– На некој начин да ги информираме граѓаните за важноста од отстранување на контејнерите со вода во текот на летните месеци бидејќи најефективниот метод е да се отстранат местата за размножување комарци – рече Драган Грубиша од Одделението за здравствена екологија на Град Загреб.
Загрепчанецот Мијо Билановиќ за ХТВ изјави дека 20 години ја обработува градината што му ја дал градот и дека секоја година ја води истата битка против комарците.
– Касаат и крвта веднаш тече, отекува, но ние сме навикнати со години, тука до Јарун ние сме први на удар – рече тој.
Тој додава дека тимот за контрола на штетници доаѓа во просек два пати месечно да ја исчисти водата што ја користи за полевање на градината, бидејќи во таа вода се размножуваат комарци.
– Во раката држам ларви од комарци кои ги фативме во буре. Ваквите буриња се третираат, на површината на водата се става препарат кој создава филм, па ларвите од комарецот не можат да дишат – објасни Дејвид Микулан од Дезинфекција. Сервис.
Методата со фаќање во буре се применува како дел од превенцијата и се спроведува таму каде што има застојани води.
Во пресрет на летото Загреб ќе почне и со прскање за комарци. Во Хрватска тоа обично се прави на крајот на јуни и почетокот на јули.
