Загадувањето на воздухот во Струмица последните двата дена е повисоко од дозволеното за повеќе од 150 милиграми на квадратен метар, соопшти Министерството за животна средина и просторно планирање кое се повикува на податоците од Државниот автоматски мониторинг систем за квалитет на амбиенталниот воздух и добиената временска прогноза од Управата за хидрометеоролошки работи.
Според информацијата во овој град среднодневните концентрации на PM10 на 31 декември биле повисоки за 187,47 микрограми на кубен метар , а вчера биле повисоки за 151,02 микрограми на кубен метар.
Министерството предложи и мерки кои треба да се преземат во Струмица:
- Да се интензивираат вонредните инспекциски надзори на инсталациите со А-Интегрирана еколошка дозвола
- Да се интензивираат вонредните инспекциски надзори на терен за контрола на инсталациите со Б-Интегрирани еколошки дозволи и Елаборати
- Инсталациите со континуиран мониторинг да овозможат јавен пристап на измерените податоци
- Да се интензивираат вонредните контроли на техничката исправност на возилата, особено оние со дизел горива и нерегистрирани возила
- Да се интензивираат вонредните контроли на градилиштата
- Забрана на горење на отворено
- Се препорачува на сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар
- Се препорачува на сите правни субјекти (работодавци) да го реорганизираат работното време и лицата кои работат на отворено да работат од 11.00 до 17.00 часот
- Се препорачува да не се организираат спортски натпревари и други културни манифестации на отворено.
Прагот на алармирање е дефиниран во Уредбата за изменување и дополнување на Уредбата за гранични вредности за нивоа и видови на загадувачки супстанции во амбиенталниот воздух и прагови на алармирање, рокови за постигнување на граничните вредности, маргини на толеранција за гранична вредност, целни вредности и долгорочни цели (Службен весник на Република Македонија бр. 183 од 14.12.2017 година).
