Во Палатата Србија се одржа вонредна седница на Владата на која се разгледуваше ситуацијата на Косово, а на покана на премиерката Ана Брнабиќ присуствуваше и претседателот на Србија, Александар Вучиќ.
Како што претходно беше најавено, Вучиќ на седницата на Владата поднесе извештај за разговорите со претставниците на Србите од Косово, кои најавија повлекување од сите приштински институции поради последните потези на Владата на Аљбин Курти.
„Ви благодарам за поканата и што ми дадовте можност да ве информирам за ситуацијата во Србија. Не се откажуваме од одговорната политика на мир и стабилност“, напиша претседателот на својот официјален Инстаграм профил по седницата.
На седницата покрај министри присуствуваа и директори на јавни претпријатија.
По завршувањето на седницата, претседателот се сретна со кинескиот амбасадор во Србија, Чен Бо, по што следуваше одвоена средба со рускиот амбасадор Александар Боцан-Харченко, а потоа и со патријархот Порфири и Синодот на СПЦ, каде ќе биде присутен и Милорад Додик.
Како што јави репортерот N1 од Палатата Србија, денеска не е предвидено претседателот да и се обрати на јавноста.
Вучиќ во петокот вечерта се сретна со специјалниот претставник на Европската унија за дијалог меѓу Белград и Приштина и други регионални прашања од Западен Балкан, Мирослав Лајчак, а на средбата се приклучи и шефот на српската дипломатија Ивица Дачиќ. Според РТС, средбата траела речиси пет часа.
