Српскиот претседател Александар Вучиќ остро негира дека Србија продава оружје на Русија или Украина. Кремљ, пак, одговори на извештаите дека станува збор за премногу сериозно прашање, па одговорот не е можен без докази.
Србија не продавала оружје ниту на Русија, ниту на Украина, увери во неделата српскиот претседател Александар Вучиќ, демантирајќи ги информациите на руските медиуми дека Србија извезува оружје во Украина преку Турција.
„Ние не сме продале ниту едно парче оружје или муниција ниту на Русија, ниту на Украина“, изјави Александар Вучиќ на маргините на конференцијата на Обединетите нации во Доха, пренесува српската новинска агенција Бета.
„Направивме сè во согласност со законот, чисти сме како солза“, тврди тој и потсети дека Србија ги испорачува производите од српската одбранбена индустрија само за овластени корисници, во согласност со меѓународните закони. Тој додаде дека зделките за извоз на српско оружје се дополнително обезбедени и дека Турција не може дополнително да го извезува без нивна согласност.
Рускиот провладин портал „Маш“ на крајот на минатиот месец напиша дека државната српска компанија за производство на оружје „Крушик“ извезла 3.500 ракети М21 од 122 мм во Турција, која потоа преку Словачка ги испорачала во Украина.
Српскиот министер за одбрана Милош Вучевиќ одговори со уверување дека Белград не продава оружје или воена опрема на „ниту една страна во конфликтот“.
На обвинувањата минатата недела одговори и Кремљ. Според руската државна новинска агенција Риа Новости, портпаролката на руското Министерство за надворешни работи, Марија Захарова, објави дека Москва ги следи наводите за можното снабдување со српска муниција за Украина, но дека се потребни факти за да се одговори, бидејќи е премногу важно прашање, и од гледна точка на руско-српските односи.
