Спротивно на оценките на многу меѓународни експерти, Кремљ изрази задоволство од она што го направи неговата војска во Украина повеќе од 10 недели по почетокот на војната, јави ДПА.
– Операцијата се одвива според планот, изјави портпаролот на Кремљ Дмитриј Песков денеска во Москва.
Инвазијата на соседната земја, која по наредба на рускиот претседател Владимир Путин почна на 24 февруари, официјална Москва ја нарекува „специјална воена операција“.
Меѓународните набљудувачи, од друга страна пак, веруваат дека Кремљ би сакал да го прослави, меѓу другото, целосното освојување на источните украински региони Луганск и Доњецк на „Денот на победата“ на 9 мај. Сепак тоа се чини се поневозможно со оглед на слабото напредување на руските трупи.
Затоа со нетрпение се чека што Путин ќе објави за понатамошниот тек на војната на традиционалната воена парада во понеделник на 77-годишнината од победата над хитлерова Германија, коментира ДПА.
Шпекулациите дека Путин би можел да нареди општа мобилизација во Русија беа веќе демантирани од Кремљ оваа недела.
