Првата пратка борбени авиони на НАТО Ф-16 пристигна во Украина, долгоочекуван потег што може да ја зајакне способноста на земјата разурната од војна да ги одбие руските напади, објавија европските медиуми, пишува Блумберг.
„Рокот за трансфер на воени авиони од американско производство беше крајот на овој месец и тој беше испочитуван“, изјавија изворите, кои сакаа да останат анонимни.
„Бројот на авиони е мал“, велат тие, додавајќи дека не е јасно дали украинските пилоти, кои во меѓувреме биле обучени, ќе можат веднаш да ги користат или процесот ќе трае подолго.
Испораката на борбените авиони на НАТО во Украина се случи повеќе од една година по постигнувањето на договорот.
Американскиот претседател Џо Бајден беше против испраќање авиони Ф-16 во Украина, но се премисли во мај минатата година, по повеќекратните молби од претседателот Володимир Зеленски и сојузниците во НАТО да се дозволи нивно пренесување.
Според медиумите, авионите ги испраќаат Данска и Холандија, додека Белгија и Норвешка ветија испораки.
