Во Токио официјално беше најавен почетокот на сезоната на цветање на црешите, десет дена порано од вообичаената сезона, додека експертите сметаат дека оваа појава, која се повторува во последните години, е поврзана со глобалното затоплување.Прогласувањето на сезоната го означува почетокот на „ханами“, јапонската традиција на восхитување на новите цветови „сакура“ (цреша) и прославување на доаѓањето на пролетта со организирање пикник со семејството или пријателите.
Цветот на црешата е настан кој будно се следи низ целата земја.
Јапонските медиуми се натпреваруваат во прогнози низ целиот архипелаг и секоја година со ентузијазам ја пренесуваат веста.
Нежните цвеќиња во бела и розова боја веќе се појавија толку рано во Токио во 2020 и 2021 година, според Јапонската метеоролошка агенција, која го следи феноменот веќе 70 години.
Минатата година сезоната беше одложена за шест дена.
„Досега имавме многу топли денови во март. Можеби и климатските промени одиграа улога“, вели претставникот на метеоролошката служба.
Во претходните години таа служба оценуваше дека пораното цветање на црешата е поврзано со порастот на температурата.
