Во Шпанија, маж кој неодамна се вратил од Екваторијална Гвинеја бил тестиран за сомневање за смртоносниот вирус Марбург. Резултатот од тестот бил негативен. Во Екваторијална Гвинеја, најмалку девет лица починаа од вирусот во февруари, а повеќе од 200 беа ставени во карантин.
Мажот, кој во саботата беше тестиран за смртоносниот вирус Марбург во Шпанија, бил негативен, потврди шпанското Министерство за здравство за Ројтерс.
34-годишникот беше тестиран од здравствените власти во Валенсија поради сомневање дека го донел вирусот од патување во Екваторијална Гвинеја, каде што повеќе од 200 луѓе биле ставени во карантин поради високо заразниот вирус Марбург.
Иако беше негативен, Шпанецот се согласи на дополнителни тестови во наредните недели. Покрај мажот, во болницата превентивно биле изолирани и здравствените работници кои го лекувале.
Во Екваторијална Гвинеја, властите неодамна ја потврдија првата појава на вирусот Марбург во земјата. Најмалку девет лица починале од вирусот, а други 16 имале сомнителни симптоми. По избувнувањето на Марбург, соседните земји Габон и Камерун го зајакнаа граничниот надзор и воведоа задолжително тестирање во пограничните региони.
Што е Марбург вирусот?
Марбург вирусот е многу опасен патоген кој предизвикува треска, крварење, па дури и откажување на органите. Тој е дел од таканаречената фамилија на филовируси, во која спаѓа и вирусот ебола, кој во минатото неколку пати ја опустоши Африка.
Природен домаќин на вирусот Марбург се африканските овошни лилјаци, животни кои лесно можат да го пренесат вирусот на луѓето. Вирусот потоа се пренесува од човек на човек преку крв или други телесни течности.
Периодот на инкубација на вирусот трае од два до 21 ден, првите симптоми се слични на оние на другите болести со тропска треска, како што се ебола, маларија и тифус, па затоа е тешко да се одреди вистинската инфекција. Според податоците на СЗО, стапката на смртност за потврдени случаи варира помеѓу 24 и 88 проценти, во зависност од верзијата на вирусот.
