Околу 406 килограми кокаин се запленети од едрилица под полско знаме во Бискајскиот залив на Атлантикот на западот на Франција, соопштија денеска локалните власти, додавајќи дека операцијата била изведена со согласност на властите во Полска.
Заплената се случила ноќта меѓу четвртокот и петокот, а дрогата била пронајдена на едрилица во Бискајскиот залив, соопшти локалната полициска префектура.
Двајца членови на екипажот на едрилица под полско знаме се обиделе да го запалат бродот во обид да го потонат заедно со дрогата.
Дрогата, поделена во 19 огромни кеси, е предадена на Националната служба за борба против наркотици, додека се проверува националноста на двајцата уапсени.
Француската царина во 2023 година заплени 12 тони кокаин на нејзина територија.
