Владата ги демантира обвинувањата на СДСМ дека осуден криминалец, кој лежел 4 години затвор, е именуван за директор на затворот Идризово, одделение Велес.
„Постоеше таков предлог за именување на в.д. заменик на директор на КПД Идризово, но по направените дополнителни проверки не е прифатен. Лицето нема да стапи на функција и ќе има ново именување на позицијата на следната седница на Влада. Во однос на директорот на затворот во Прилеп, за секој поединец има пресумпција на невиност, постоењето на кривична пријава без пресуда, која е правосилна, не е гаранција за сторено кривично дело.
Апелираме СДСМ да не шпекулира и да ја дезинформира јавноста“, соопшти Владата.
Претходно Менде Илиевски, советник на СДСМ во Советот на општина Битола, одржа прес-конференција на која го обвини премиерот Мицкоски дека ставил криминалец за в. д. директор на затворот Идризово, одделение Велес.
Станува збор за Ибрахим Ељези, кој лежел затвор од 2013 година до 2016 година во затворот Идризово. Тој бил осуден за неовластено производство и продажба на дрога, тврди Менде Илиевски.
Илиевски исто така изјави дека Емил Јанески, со кривична пријава за „несовесно работење“, со одлука на Мицкоски е именуван за в.д. директор на затворот во Прилеп.
– Јанески во 2020 година бил директор на ЈКП „Водовод и канализација” – Прилеп и против него МВР има поднесено кривична пријава за „несовесно работење во службата” и штета врз буџетот од препријатието во висина од 2.3 милиони денари – изјави Илиевски.
