Високи руски функционери се бесни откако британското кралско семејство одби да ги покани на погребот на кралицата Елизабета Втора. За тоа време Киев, со кој Москва е во конфликт од февруари, потврди дека првата дама Олена Зеленска во име на Украина ќе присуствува на последното збогување со Елизабета.
И додека официјални лица ширум светот беа поканети на погребот, кој многумина го нарекуваат најголемиот на овој век, рускиот претседател Владимир Путин не беше поканет, иако за време на неговото владеење неколкупати се сретна со кралицата Елизабета Втора.
– Овој потег на Британците го гледаме како обид да се искористи националната трагедија, која допре до срцата на милиони луѓе ширум светот, за геополитички цели и да се пресметаат со нашата земја во моментите на нивната најголема тага – рече портпаролката на руското Министерство за надворешни работи, Марија Захарова.
Таа додаде дека тоа е „особено богохулно за споменот на Елизабета Втора“, пренесува „Sky News“.
Портпаролката на руската дипломатија изрази жалење што Велика Британија ја користи руската офанзива во Украина како „изговор“ да не ги кани руските претставници на погребот на Елизабета Втора, што ќе се организира во понеделник во Лондон.
Русија и Велика Британија се во затегнати односи од февруари, кога започна конфликтот во Украина, откако британските власти од самиот почеток му даваа поддршка и помош на Киев.
Во име на Украина доаѓа Олена Зеленска
Погребот на Елизабета Втора во Вестминстерската опатија следната недела исто така ќе биде голем дипломатски настан. Се очекува доаѓањето на повеќе од 100 членови на различни монархии, шефови на држави и други личности.
Со оглед на тоа што украинскиот претседател Володимир Зеленски не може да ја напушти земјата, која е во конфликт со Русија, Украина на погребот ќе ја претставува првата дама Олена Зеленски.
– Присуството на Олена Зеленска е уште еден доказ колку Украина има поддршка од целиот свет за време на конфликтот во нивната земја. Велика Британија и Украина се сојузници. Нејзиното доаѓање е доказ за големо пријателство – изјавил за „The Sun“ извор близок до кралското семејство.
Да потсетиме, Велика Британија не ги покани претставниците на Русија, Белорусија и Мјанмар да присуствуваат на државниот погреб на кралицата Елизабета Втора, кој ќе се одржи во понеделник. На погребот на кралицата се очекува да присуствуваат околу 500 достоинственици од целиот свет. За повеќето земји, поканата се однесува на шефот на државата плус еден гостин.
