Вечерва е финалето на најголемото музичко натпреварување во Европа, Евровизија. Популарното музичко шоу ќе го водат актерката Хана Ведингам, позната по бројни улоги во театарски мјузикли, но и во хит серијата „Тед Ласо“, Алиша Диксон поранешната членка на жирито на шоуто „Britain’s Got Talent“, украинската музичарка Јулија Санина и познатиот водител Греам Нортон.
На ова 67. издание на Евровизија учествуваат 37 земји, три помалку од лани. Во финалето влегоа 26 натпреварувачи. Покрај избраните натпреварувачи во полуфиналните вечери на 9 и 11 мај, тука е и „големата петорка“ составена од Велика Британија, Франција, Германија, Шпанија и Италија, кои придонесуваат најмногу финансиски на натпреварот, како и минатогодишниот победник – Украина.
Главен фаворит кај обложувалниците годинава е Шведска, која по втор пат ја претставува Лорин. Таа веќе победи на „Евровизија“ 2012 година, а оваа година настапува со песната „Tattoo“. И Финска има добри шанси – раперот Карија настапува со мешавина од метал, техно и синт-поп и вели дека неговата песна „Ча Ча Ча“ му оддава почит на германскиот бенд „Рамштајн“. Меѓу најспомнуваните во обложувалниците се и украинското дуо „Творчи“ со песната „Heart Of Steel“ и француската пејачка Ла Зара со нејзината „Evidemment“.
На овогодишниот Евросонг, Северна Македонија нема да има свој претставник.
Украинската група „Калуш оркестра“ лани победи на „Евровизија“ со песната „Стефанија“. Овогодишното натпреварување требаше да се одржи во Украина, но поради војната беше преместено во Ливерпул. Велика Британија минатата година го освои второто место со пејачот Сем Рајдер. Годинешното мото „United By Music“ („Обединети со музиката“) ги содржи боите на Украина и Велика Британија.
Ливерпул веќе влезе во историјата на светската музика – легендарните „Битлс“ се од тој град. Но, тоа очигледно има своја цена… Сместувањето и билетите нагло пораснаа откако се дозна дека Ливерпул ќе биде град-домаќин на овогодишниот „Евросонг“. Така, за едно ноќевање неделава, додека трае натпреварувањето, треба да се издвојат повеќе од 2.000 евра.
Ниту цените на влезниците не се евтини. Пробите, на пример, може да се следат за дури 34 евра, а билет за финалето чини и до 427 евра. Сепак, салата е веќе целосно распродадена. Оние пак, кои сакаат посебно искуство во ВИП-ложата, ќе треба да издвојат 4.260 евра по лице, но со одличен поглед на бината, шампањ и „шведска маса“.
Меѓутоа, тие цени не важат за украинските бегалци. За нив британското Министерство за култура, медиуми и спорт набавило 3.000 билети, што значи дека, како што вели британската министерка за култура – Луси Фрејзер, „илјадници билети им се понудени на воените бегалци за да учествуваат во шоуто во кое се слави нивната татковина, нивната култура и нивната музика“. Украинците можат да купат билет и за 20 евра.
