Ураганот Берил го продолжува својот разурнувачки марш низ Карибите, каде досега однесе најмалку шест животи. Исклучително силната бура за овој период од годината моментално се движи низ отворено море кон Јамајка како ураган од четврта категорија со ветрови до 150 милји на час.
Три лица загинаа во Гренада, каде што ураганот падна на копно во понеделникот, според официјални лица. Уште еден смртен случај поради невремето е пријавен во Сент Винсент и Гренадини, а две лица загинаа на северот на Венецуела, јави американската телевизија ABC.
Како ураган од петта категорија, Берил во вторникот го надмина јулскиот рекорд од 165 милји на час поставен од ураганот Емили во 2005 година, според Националниот центар за урагани на САД.
Во Јамајка три меѓународни аеродроми беа затворени во пресрет на ураганот, кој со себе носи и големи количества врнежи. Ветровите со ураганска сила веројатно дотогаш малку ќе се смират, но се очекува бурата да генерира бранови високи неколку метри. Веќе во вторникот, надворешните појаси на ураганот се водеа над јужните делови на Доминиканската Република и Хаити. Во меѓувреме, жителите на островите Сент Винсент и Гренадини ги чистеа и проценуваа штетите од невремето. На еден од островите властите соопштија дека 90 отсто од куќите се уништени или тешко оштетени, а откорнат е и покривот на единствениот аеродром на островот.
Температурата на површината на морето во источниот дел на Карибите каде што моментално се наоѓа Берил е повисока од просечната за овој период од годината и повеќе во согласност со врвот на сезоната на урагани во Атлантикот. Ова обезбедува доволно енергија за екстремно зајакнување на ураганите.
Се очекува ураганот Берил да го продолжи својот пат кон полуостровот Јукатан и остатокот од источниот брег на Мексико, каде постепено ќе ослабне и ќе стане тропска бура до крајот на неделата.
