Руските власти тврдат дека украинските беспилотни летала нападнале цели во рускиот регион Краснодар во текот на ноќта, недалеку од палата на Владимир Путин.
– Остатоците од еден од дроновите оштетиле недовршен објект во село Криница. Вториот дрон удрил во дрвја во селото Џанхот, а пожарот е изгаснат. Првите извештаи покажуваат дека нема жртви – изјави Вениамин Кондратиев, гувернер на Краснодарската област.
Тој нагласи дека руските единици за противвоздушна одбрана ги уништиле сите беспилотни летала што ги лансирале Украинците. Руското Министерство за одбрана соопшти дека во текот на ноќта биле уништени четири дронови во Краснодарската област.
Токму во близина на селото Џанхот се наоѓа имот и палата кои се поврзуваат со Путин. Во јануари 2021 година, починатиот руски опозициски лидер Алексеј Навални и неговите соработници објавија документарен филм за палатата. Извештајот и двочасовниот документарец објавени од Антикорупциската фондација на Навални (ФБК) понудија опширен увид во палатата.
Од ФБК тврдат дека од подизведувачот добиле детални градежни цртежи, како и список на купен мебел и фотографии од примероци од подот. Со помош на собрани документи и фотографии направиле 3Д модел на ентериерот.
Истрагата на Навални тврди дека имотот има површина 39 пати поголема од онаа на Монако. Според нацртите, замок има површина од 17.691 квадратни метри и се состои од 11 спални соби, неколку дневни соби и сали, приватен театар, кино, казино, две бањи, турски бањи, пекара и „валкани соба“ со непозната намена.
