Украинските власти тврдат дека армијата им нанела „огромни загуби“ на руските сили во денешниот успешен контранапад во близина на источниот град Бахмут.
Андриј Билецки, шеф на украинската 3-та јуришна бригада, во обраќањето објавено на Телеграм рече дека „единиците на 72-та бригада на Руската Федерација се поразени“.
Тој додаде дека целосно се уништени „6-та и 8-та чета на дивизијата“ и значителен број оклопни борбени возила.
Билецки рече дека армијата зела „значителен број заробеници“ и дека „третата јуришна единица Вагнер, исто така, претрпе големи загуби“.
Тој рече дека офанзивата „целосно ослободила“ област широка 3 километри и долга 2,6 километри од руските сили, но не ја прецизираше точната локација.
Портпаролот на украинските вооружени сили Серхи Черевати додаде дека битката „сè уште трае“, но дека „непријателот трпи огромни загуби во оваа област“.
Сепак, тој исто така истакна дека „не недостига муниција, туку луѓе“.
Портпаролот рече дека имало 524 напади врз украинските позиции околу Бахмут.
Русија претрпе големи загуби во својата повеќемесечна битка за градот, но сè уште не успеала да го освои.
„Доколку тие [Вагнер] не добијат повеќе персонал или не ја променат својата тактика, во блиска иднина, ПМЦ Вагнер повеќе нема да постои во оваа област“, додаде Черевати.
