Француските власти покренаа итна истрага откако тројца тинејџери претепаа 14-годишно девојче пред нејзиното училиште, оставајќи го во кома. Полицијата привела тројца малолетници за убиство во обид, меѓу кои и девојче од истото училиште во кое учела и жртвата.
Обвинителите подоцна изјавија дека 14-годишната Самара се разбудила од кома, но дека била сериозно повредена во нападот, кој се случил пред колеџот Артур Рембо во областа Ла Мосон-Ла Пајлад во вторникот попладне.
Оттаму додаваат дека едно од обвинетите, 14-годишно девојче од истото училиште, признало дека ја претепало жртвата. Другите двајца уапсени малолетници се на возраст од 14 и 15 години. Мајката на жртвата Хасиба рекла дека ученичка од училиштето две и пол години ја малтретирал нејзината ќерка затоа што се облекувала и се однесувала премногу слободно за исламот.
– Навистина не разбирам зошто тоа девојче постојано ја напаѓа Самара, но има причина. Мислам дека тоа е затоа што Самара е малку послободна од некои ученици – рекла мајката, а пренесува „Гардијан“.
Хасиба смета дека оваа ученичка е главниот виновник за нападот. Таа додаде дека минатата година објавила фотографија од нејзината ќерка на социјалните мрежи и повикала да ја силуваат, поради што во јуни 2023 година била суспендирана на два дена од училиште.
