САД тврдат дека руските сили поставиле морски мини во Црното Море и се подготвуваат за можни напади врз цивилни бродови, јавија локалните медиуми.
– Нашите информации покажуваат дека Русија поставила дополнителни морски мини на приодите до украинските пристаништа. Веруваме дека ова е координиран напор да се оправдаат какви било напади врз цивилни бродови во Црното Море и да се обвини Украина за тие напади – изјави портпаролот на Белата куќа за Националниот совет за безбедност, Адам Хоџ.
Москва се повлече од договорот со кој се дозволува безбеден извоз на жито од украинските пристаништа во Црното Море, а потоа предупреди дека сите бродови што пловат кон Украина сега ќе се сметаат за потенцијални носители на воена опрема, односно воени цели.
Рускиот претседател Владимир Путин не ја исклучи можноста за враќање на договорот, но само под руски услови.
– Москва првично доби гаранции од Западот дека ќе бидат исполнети неколку барања. Штом се исполнат сите овие услови за кои претходно се договоривме, веднаш ќе се вратиме на договорот – рече Путин вчера на состанокот со руските претставници, пренесоа руските медиуми.
Црноморскиот договор за жито беше склучен со посредство на Турција и Обединетите нации и требаше да го олесни рускиот и украинскиот земјоделски извоз.
Министерство за одбрана вчера соопшти дека од полноќ сите бродови што ќе пловат кон украинските пристаништа ќе ги третира како потенцијални превозници на воен товар, а земјите под чии знамиња тие пловат ќе ги смета за страни во конфликтот од украинска страна.
По оваа објава, цените на пченицата на европските пазари скокнаа за 8,2%, а на пченката за 5,4% во споредба со претходниот ден. Цените на американската пченица вчера пораснаа за 8,5%, најмногу во еден ден од почетокот на руската инвазија.
Договорот истече на 17 јули, откако Русија одби да го обнови учеството во него. Москва се жали дека не е спроведен и паралелниот договор за олеснување на правилата на рускиот извоз на храна и ѓубрива.
Оттогаш, Русија веќе трет ден по ред ги ракетира украинските пристанишни области. Во последните напади на Одеса и Миколаив се повредени најмалку 20 луѓе.
По повлекувањето на Русија од договорот, што би можело да го влоши глобалното снабдување со храна, Украина најави дека ќе воспостави привремени извозни маршрути преку Романија, која исто така има излез на Црното Море.
Министерот за земјоделство на Украина, Микола Солски, изјави дека во вчерашното руско ракетирање на Одеса биле уништени 16.000 тони жито и значителен дел од инфраструктурата за извоз.
