Цените на становите во Скопје во третиот квартал годинава бележат раст од 2,9% во однос на претходниот квартал, а на годишно ниво од 11%, објави денеска Народната банка.
Во првиот квартал годинава цените на становите забалежаа раст од 18,8% на годишно ниво, односно од 1,3% на квартално ниво, а во второто тримесечие од 1,6%, односно од 12,9%.
Во првиот квартал лани недвижностите поскапеа за 12,4% на годишно ниво, по што следеше раст, од 16,6% во вториот квартал, од 21,2% во третиот и од 20,6% во четвртиот квартал.
Претседателката на Групацијата за недвижности при Стопанската комора на Северна Македонија Лилјана Ковачева, преходно во изјава за МИА оцени дека кај цените на недвижностите во последните месеци се бележи стабилизација и ќе нема промени подолг период.
– По завршувањето на Ковид кризата на пазарот на недвижности значително се зголеми побарувањето. Истовремено, како резултат на воениот судир во Украина и енергетската криза значително се зголемија цените на градежите материјали, што доведе до зголемување на цените на новите градби, а зголемената побарувачка на пазарот доведе до тоа зголемените цени пазарно да се прифатат. Сепак, според мое мислење, продавачите ги зголемија цените повеќе од што пазарот може да прифати и поради тоа, по првото тримесечје настана извесен застој со мала корекција на цените во правец на нивно намалување. Според мене, она што се случува во последните неколку месеци е всушност стабилизација на цените на одредено ниво и престанок на растот што беше забележлив пред тоа и моето мислење е дака подолг период во иднина нема да има промени во цените – изјави Ковачева.
Народната банка го подготвува индексот на цените на становите за територијата на Скопје, врз основа на податоци кои се однесуваат на огласите за продажба објавени од агенциите коишто се занимаваат со промет со недвижности.
