Руските авиони и воздушната одбрана соборија уште шест украински беспилотни летала, изјави портпаролот на руското Министерство за одбрана, генерал-мајор Игор Конашенков.
„Авионите и воздушната одбрана на руските воздушни и вселенски сили синоќа соборија шест украински беспилотни летала, вклучувајќи го и дронот „Бајрактар ТБ-2““, рече Конашенков.
Според Конашенков, руските тактички, воени и беспилотни летала биле насочени кон 81 украински воен објект, вклучувајќи „четири повеќецевни ракетни фрлачи, три командни пунктови, осум складишта за муниција и 28 складишта за воена опрема“.
Наводите на руската армија не можеа да бидат независно потврдени.
Во јужниот град Вознесенск во областа Миколаев во Украина, руските вооружени сили наводно гранатирале складиште во кое имало оружје, јавува порталот Украина 24, повикувајќи се на градоначалникот на градот, а пренесува Би-би-си.
Засега нема информации дали има жртви, се додава.
Русија во петокот наутро лансираше шест проектили врз западниот град Лавов, соопштија украинските вооружени сили.
Ракетите најверојатно биле крстосувачки ракети истрелани од воени авиони над Црното Море, се вели во соопштението објавено на официјалната Фејсбук страница на украинските вооружени сили.
Два проектили се пресретнати од системи за противвоздушна одбрана, се додава во соопштението.
Градоначалникот на Лавов претходно изјави дека проектилите ја погодиле фабриката за поправка на авиони во близина на аеродромот.
