Три лица загинаа, а 12 се повредени во самоубиствен напад пред банка во градот Кандахар, упориште на талибанците во јужен Авганистан, во четвртокот, изјави за AFP портпарол на провинцијата.
„Утринава се случи самоубиствен напад пред банка во Кабул, три лица загинаа, а 12 се ранети“, изјави Инамула Самангани, шеф на Одделот за информации и култура на провинцијата Кандахар.
„Жртвите се цивили“, рече функционерот, додавајќи дека цел на нападот биле луѓе кои дошле да си ги подигнат платите во таа банка.
Нападот се случил во 08:00 часот по локално време во центарот на голем град на југот на Авганистан, додека муслиманската земја е во Рамазан, месецот на постот.
Талибанските власти брзо ја опколија областа и им забранија на новинарите да фотографираат и снимаат, како што тоа обично го прават.
Новинарот на АФП видел возила на брза помош како ги земаат жртвите и ранетите на местото на настанот.
Самангани, кој бил во една од болниците каде што биле примени жртвите, негираше дека има итна потреба од крв, спротивно на објавеното на социјалните мрежи.
„Тој проблем не постои. Повредените лица не се потешко повредени“, уверува Самангани во пораката до новинарите.
Болниците во Кандахар одбија да соопштат информации за ранетите, велејќи дека им било наредено да не даваат изјави за медиумите.
Безбедносните лица и пожарникарите брзо ја расчистија областа од нападот каде што беа видливи траги од крв, облека, чевли и остатоци.
Бројот на бомбашки напади и самоубиствени напади во Авганистан значително се намали откако Талибанците се вратија на власт во август 2021 година и е релативно безбеден.
Сепак, бројни вооружени групи, особено џихадистите на Исламската држава, сè уште претставуваат закана.
Од почетокот на Рамазан пред две недели во Авганистан беа пријавени бројни експлозии, но талибанците потврдија само неколку.
