„Ќе ѝ помогнеме на нашата земја да заздрави“.
Ова денеска го изјави републиканскиот претседателски кандидат, Доналд Трамп.
Тој им се обрати на своите поддржувачи во Палм Бич на кои им вети дека „ќе ги поправи границите“, додавајќи дека тој и неговата партија испишале историја со причина.
– Америка ни даде моќ и мандат без преседан. Ја вративме контролата врз Сенатот, а тоа е добро – рече Трамп.
– И трките во Сенатот во Монтана, Невада, Тексас, Охајо, Мичиген, Висконсин, големиот Комонвелт на Пенсилванија, сите беа освоени од движењето МАГА (Make America Great Again). Бројот на победи во Сенатот беше апсолутно неверојатен – рече Трамп.
Тој му се заблагодари на американскиот народ за „извонредната чест да биде избран за 47-ми претседател и за 45-ти претседател“.
– Ќе се борам за вас, за вашето семејство и за вашата иднина секој ден. Ќе се борам за вас со секој здив во моето тело. Нема да мирувам додека не ја испорачаме силната, безбедна и просперитетна Америка каква што ја заслужуваат нашите деца и каква што ја заслужувате вие. Ова навистина ќе биде златното доба на Америка – им рече тој на своите поддржувачи во Флорида.
Тој истакна дека „Бог со причина го поштедил неговиот живот“.
– И таа причина беше да ја спасиме нашата земја и да ја вратиме Америка на нејзината величина. И сега ќе ја исполниме таа мисија заедно. Задачата пред нас нема да биде лесна, но ќе ја употребам секоја унца енергија, дух и борба, што ги имам во мојата душа, за работата што ми ја доверивте – им рече тој на поддржувачите.
Републиканскиот кандидат за потпретседател Џеј Ди Венс, му се заблагодари на Трамп што му дозволил да се приклучи на неговата кампања.
Зборувајќи пред поддржувачите, Венс му се заблагодари на Трамп за „довербата што му ја дал“.
– Мислам дека штотуку бевме сведоци на најголемото политичко враќање во историјата на Соединетите Американски Држави – рече Венс, иако неколку држави сè уште ги бројат гласовите.
Тој вети дека тој и Трамп сега ќе го „водат најголемото економско враќање во американската историја“.
Според досегашните проекции, Трамп има 266 електорски гласови, а кандидатката на демократите, Камала Харис, има 195.
Потребни се најмалку 270 електорски гласови за победа на претседателските избори.
