Поранешниот американски претседател Доналд Трамп рече дека нема да сведочи во судницата во Њујорк оваа недела, каде што се очекуваше да се појави по втор пат за да докаже дека неговата компанија не ја претставила погрешно вредноста на своите имоти за да добие поволно финансирање.Судскиот процес за граѓанска измама, кој започна во октомври, е еден од неколкуте правни предизвици со кои се соочува поранешниот претседател додека се обидува да се врати во Белата куќа.
Трамп на социјалните мрежи рече дека „нема да сведочи во понеделник“. Поранешниот претседател и републикански фаворит за следните претседателски избори изјави дека веќе сведочел и дека „нема што повеќе да каже освен дека се работи за целосно мешање во изборите“. Во своето прво појавување во ноември, Трамп често избегнуваше директни одговори и поминуваше многу време жалејќи се на нефер третман.
Судијата што го надгледува судењето, Артур Енгорон, веќе пресуди дека Трамп и неговите возрасни синови манипулирале со финансиските извештаи за да ги измамат банките и осигурителите со цел да добијат подобри услови за заеми и осигурување.
Обвинителката на државата Њујорк Летиција Џејмс бара отштета од 250 милиони долари и трајна забрана против Трамп и неговите синови Доналд Џуниор и Ерик да водат бизнис во Њујорк.
Трамп се соочува со четири неповрзани федерални и државни кривични обвиненија, вклучително и две кои произлегуваат од неговите обиди да ги поништи резултатите од претседателските избори во 2020 година. Тој се изјасни за невин во сите тие случаи.
Сепак, ниту еден од овие случаи не го загрози неговото водство во трката за републиканска претседателска номинација и предизвикување на демократскиот претседател Џо Бајден на изборите следниот ноември.
