Товарниот брод, кој патуваше од Германија за Египет кога избувна пожар на 26 јули, беше одвлечен на локација северно од холандските острови Амеланд и Шиермоникуг, се вели во соопштението на Министерството.
Пожарот на бродот Fremantle Highway, регистриран во Панама, кој превезуваше нови автомобили, резултираше со смрт на индиски член на екипажот, а повредени се седуммина кои скокнаа во водата за да се спасат од пламените јазици. Јапонскиот сопственик на бродот, Шои Кисен, изјави дека сите 21 член на екипажот се Индијци.
Портпаролката на холандското министерство изјави за холандската новинска агенција АНП дека на новата привремена локација бродот ќе биде далеку од бродските рути и повеќе заштитен од ветрот. Трансферот е само чекор во тешката спасувачка операција, рече портпаролката.
K Line, која го изнајми бродот, во петокот соопшти дека на бродот имало 3.783 возила, вклучително и 498 електрични возила со батерии, што е значително повеќе од првично пријавените 25. Компанијата одбила да каже за брендовите на автомобилите, вклучително и дали тие вклучуваат автомобили од јапонски производители.
Литиум-јонските батерии на електрични возила горат со двојно поголема енергија од вообичаениот пожар, а поморските експерти и осигурителите велат дека индустријата не се справила со ризиците.
