Ирската комисија за заштита на податоци (DPC), која дејствува во име на ЕУ, изрече казна од 345 милиони евра на кинеската социјална мрежа TikTok поради кршење на правилата за ракување со податоците на малолетните корисници. Како одговор, TikTok објави дека неопходните мерки за отстранување на прекршувањата главно биле преземени пред почетокот на истрагата во 2020 година.
Истрагата за ракувањето со податоците на малолетните корисници од страна на TikTok, која траеше од јули до декември 2020 година, се фокусираше на некои поставки во апликацијата и проверка на возраста за време на процесот на регистрација на корисниците, пренесува германската агенција dpa.Стандардно, видеата и објавите на корисници на возраст меѓу 13 и 17 години беа достапни за сите корисници, како и можноста за коментирање на објавите, што е спротивно на општата регулатива за заштита на податоците на ЕУ (GDPR).
Во меѓувреме, компанијата TikTok објави дека наодите од истрагата главно се однесуваат на стандардните поставки кои важеле пред три години.
„Повеќето од овие резултати веќе не се релевантни поради мерките што ги воведовме уште пред почетокот на истрагата“, соопштија тие. Во согласност со новите поставки, сите профили на корисници помлади од 16 години автоматски се означени како посебни и не се достапни за секого.Покрај казната, на TikTok му беше наредено и целосно да ги усогласи своите системи за обработка на податоци со GDPR во рок од три месеци. До крајот на следното лето, TikTok ќе ги обработува податоците на европските корисници во новите центри за обработка на податоци во Ирска и Норвешка.
TikTok, кој е во сопственост на кинеската корпорација Bytedance, на тој начин се обидува да ја зајакне довербата во Европа, бидејќи во последно време се повеќе се појавува загриженоста за ширењето на влијанието на Кина преку TikTok. Во последниве месеци, Европската комисија и многу европски влади ја забранија употребата на апликации на мобилните телефони на нивните вработени.
