Оваа власт ја карактеризираат наместените тендери. Тоа почна уште првиот ден кога Зоран Заев стана премиер. Правата голема афера која ја презентиравме „Леонардо“ во која актер беше поранешниот генерален секретар на владата, Драги Рашковски, кој е обвинет, местеше тендер за радари за контрола на летање по цена од милион евра повисока од реалната – рече потпретседателот на ВМРО-ДПМНЕ, Александар Николоски во вечерашното гостување на ТВ Алфа.
Николоски како што рече „најголем тендераш е ЕЛЕМ, а таму најголем субјект е РЕК Битола кој е најголем производител на електрична енергија во земјава“.
Според него интересно и специфично е што во овие тендери што одат за ЕЛЕМ, односно за РЕК Битола во случајов некако нема мотивација за пријавување на повеќе компании. Тој додаде дека најчесто на најголем дел од тендерите се пријавува по еден понудувач.
Па така еден од последните примери е тендерот за 4,2 милиони евра за адитиви кои помагаат да се формира помалку згура при согорување на јаглен и за ова се пријавила само една компанија за која не се знае дали воопшто има вработени и регистрирана е со основачки влог од пет илјади евра. Минатата година имала вкупен обрт од 350 илјади евра, а годинава за само еден тендер добива 4,2 милиони евра. И така ќе носат 190 тони адитив со единечна цена 18.570 евра по тон – информираше Николоски.
Николоски рече дека „во тендерот точно ја напишале спецификацијата која одговара само на адитивот што го нуди оваа фирма“ или народски кажано, „ставиле слика“ од оној кој треба да го добие тендерот.
– И затоа не се пријавува никој друг, друга компанија, друг адитив со сличен состав може има друга компанија, но опишан е еден конкретен на една компанија. Инаку компанијата е регистрирана за дистрибуција на весници, трговија со весници и трафики, а тоа јасно потврдува колкав е криминалот во Македонија пред сè во ЕЛЕМ и РЕК Битола или се смени и директор, но навиките се исти – заклучи Николоски.
фото: МИА
