Осомничените милитанти утринава се упатија низ контролен пункт во пакистанската престолнина Исламабад и извршија самоубиствен бомбашки напад во кој загина еден полицаец, а неколку други беа ранети, јавува Ројтерс.
„Нашите првични информации се дека во автомобилот имало маж и жена“, изјави за новинарите шефот на операции на Исламабад, Сохаил Зафар.
Автомобилот не застанал на контролниот пункт кога полицијата се обидела да го запре, рече тој.
„Додека го бркаа, луѓето во автомобилот го разнесоа. Тоа беше самоубиствена експлозија“, додаде тој.
Ранети се четворица полицајци и двајца цивили.
Министерството за внатрешни работи соопшти дека возилото било натоварено со експлозив и дека сторителите се упатиле кон мета со висока вредност во главниот град.
„Доколку автомобилот стигнеше до својата дестинација, ќе предизвикаше голема загуба на животи“, изјави министерот за внатрешни работи Рана Санаула за телевизијата „Гео њуз“.
Главниот град веќе беше во состојба на готовност поради заканите од таков напад, рече министерот.
„Навремената интервенција на агенциите за спроведување на законот спречи крвопролевање“, се вели во изјавата на премиерот Шехбаз Шариф.
Експлозијата се случи во близина на седиштето на полицијата на главниот пат што води до седиштето на парламентот и институциите во земјата.
Според Ројтерс, пакистанските талибанци ја презеле одговорноста за нападот со автомобил-бомба, велејќи дека тоа е одмазда за убиството на еден од нивните водачи.
„Ја преземаме одговорноста за самоубиствениот напад врз непријателот на исламот“, се вели во соопштението на милитантите познати како Техрик-е-Талибан Пакистан (ТТП).
