Судскиот совет одобри притвор и му го одзеде имунитетот на врховниот судија Наќе Георгиев кој вчера беше уапсен со 10.000 евра под сомнение дека вршел кривично дело „Примање награда за противзаконито влијание“.
Одлуката е донесена ноќеска на итна седница на Судскиот совет и како што се наведува во соопштението е донесена по барање на Основниот кривичен суд Скопје за одземање на имунитет на судија и за одобрување на притвор на судија.
Советот ги донесе следните одлуки:
„Го одзема имунитетот на судија на Врховниот суд на РСМ, заради непречено водење на кривичната постапка; го одобри барањето за одобрување на притвор на судија на Врховниот суд на РСМ поднесено од судија на претходна постапка на Основниот кривичен суд Скопје и времено го оддалечи од вршење на судиската функција судијата на Врховниот суд на РСМ, до правосилно завршување на кривичната постапка“.
