Клиниката Жан Митрев соопшти дека Кривичниот суд на ден пред почеток на судското рочиште ѝ ги блокира сметките, а тоа како што велат оттаму, ќе значи целосно парализирање на работата на оваа здравствена установа.
„Укажуваме дека со донесените мерки целосно се блокира работењето на болницата Жан Митрев, која е здравствена организација од јавен интерес. Клиниката од денеска не може да ги отплаќа обврските кон банките“, се вели во соопштението од Клиниката.
Од Клиниката сметаат дека е целосно неосновано образложението на Кривичниот суд дека се блокираат сметки на правни лица кои не се од интерес на клиниката.
– „ПЗУ Жан Митрев Струмица“ и „Битола“, не можат сами да ги покријат инвестициите и тие ги покрива матичната клиника во Скопје. Другиот правен субјект „Фила Фарм“ работи со позајмица за да може да ги исплаќа побарувањата на правниот субјект „ЛАБС“, кој е исто основан и поврзан со клиниката „Жан Митрев.“ Друштвата кои се наведени се формирани и се финансираат согласно законската регулатива во државата и истите се тесно поврзани со функционирањето на клиниката. Тие вработуваат голем број луѓе и истите се двојно пораснати во капитал – велат од Клиниката.
Оттаму додаваат дека ќе направат се за да продолжат со нормално работење.
„Сакаме да ја информираме јавноста дека ќе направиме сè што е во нашите можности и лекувањето на ниту еден пациент нема да биде доведено во прашање иако, постапките на Кривичниот суд, а на барање на обвинителството одат во поинаква насока односно бараат наше затворање. Се што баравме е фер судење во однос на лагите и невистините пласирани против нашата Клиника, а добивме пресуда пред отпочнување на судскиот процес“, се наведува во соопштението.
Клиниката, како што наведува во соопштението, го очекувала овој развој на настаните по седуммесечната синхронизирано организирана хајка и бара од јавноста и од претставниците на меѓународната заедница во Македонија да се заинтересираат и да го следат судскиот процес.
„Потенцираме дека ваквото решение на Кривичниот суд е во спротивност со начелата на презумција на невиност и создава неиздржлив притисок врз Клиниката Жан Митрев“, се наведува во соопштението.
