Студениот бран што го зафати Скопје и околината утрово ја донесе и првата снежна покривка на Водно. Камерите поставени на Милениумскиот крст регистрираа снежни врнежи кои ја покрија планината. Утрото во главниот град беше студено и врнежливо, со ниски температури кои се очекува да опаднат за дополнителни пет до седум степени во наредните денови, според метеоролошките најави.
Покрај Водно, снег има и на планинските туристички центри Попова Шапка и Пониква. Во источниот дел на земјата, снежни врнежи се забележани во Делчево и околните села, како и во општините Македонска Каменица, Берово и Пехчево. Најмногу снег има на планината Голак, како и во селата Тработивиште и Ѕвегор во близина на Граничен премин Делчево.
Снегот влијаеше и на сообраќајот – според АМСМ, патниот правец Кратово – Пробиштип е затворен за тешки моторни возила од 07:00 часот поради наноси од снег, а патниците се предупредени на внимателност и користење зимска опрема.
