Во Австрија е прогласена вонредна состојба откако некои села во јужната провинција Корушка беа отсечени поради лизгање на земјиштето и поплави по обилните дождови.
Обилните врнежи ја зафатија областа ноќта меѓу вторник и среда.
Во тој реон во спасувањето на локалното население учествувале 30 противпожарни единици, планинската спасувачка служба со кучиња трагачи трага по две исчезнати лица, а загина едно постаро лице.
Локалните власти соопштија дека повеќето луѓе се спасени. Тие ги молат луѓето да не ги напуштаат куќите и по можност да останат на горните катови. Опасноста од лизгање на земјиштето е преголема според локалните власти.
– Три села се целосно отсечени од светот – изјави Мелани Рајтер портпаролка на организацијата за Корушка, регион на границата со Италија и Словенија кој е погоден од лоши временски услови.
– За неколку часа падна толкава количина на врнежи како за цел јуни – изјави Герхард Хохенвартер од австрискиот институт за метеорологија и геодинамика.
Австрија доживеа оваа недела прво екстремен топлотен бран, потоа серија од грмотевици. Научниците предупредуваат дека зголемувањето на бројот на екстремни временски услови во Европа е директна последица на глобалното затоплување.
