Недалеку од судот каде денеска започна судењето на поранешниот претседател на Косово Хашим Тачи и на уште тројца високи лидери на поранешната ОВК, се собраа стотици Албанци кои живеат во дијаспората да го изразат своето незадоволство од почетокот на судењето на Тачи и другите. .
На протестот можеше да се забележат транспаренти на кои пишуваше дека „судот е политички“, дека „ОВК водеше ослободителна борба“, дека „жртвите не треба да се поистоветуваат со криминалци“, како и други слични пароли.
Оние кои дојдоа во Хаг од други европски земји истакнаа дека судот е голема неправда кон Косово.
„Дојдовме овде на денот кога почна судењето, со цел да го кренеме гласот и да и дадеме до знаење на меѓународната јавност дека ова е неправда која ќе биде црна дамка за меѓународното право. Преземањето на ослободителите од народот, оние кои ја започнаа војната, го ослободија Косово од стогодишна окупација, изгореа за Косово, е голема неправда, затоа апелираме што поскоро да бидат ослободени, како херои што се, “ рекоа на протестот.
„Косово не требаше да го формира овој суд, подобро ќе беше Обединетите нации да го формираат. За жал, пратениците си го направија ова, бидејќи самите гласаа за тоа“, велат тие.
Инаку, во неделата имаше протест во Приштина, каде илјадници луѓе дојдоа од цело Косово да маршираат во поддршка на нивните херои во војната и мирот.
Ако се суди според досегашните реакции во Приштина и пред Специјалниот суд во Хаг, владее поларизирано расположение. Од една страна се посочува дека Косово направило малку за спроведување на правдата, а од друга се смета дека специјалниот суд бил непотребен, бидејќи ОВК било движење кое ги бранело Албанците од тогашниот режим.
