Пресудата на Арбитражниот суд во Париз, според која Северна Македонија треба да плати оштета за прекрушување на договорот со ОКТА, е пристигнат пред два-три дена и во моментот се разгледува и анализира од страна на адвокатскиот тим ангажиран од Владата, потврдија од кабинетот на министерот Димитар Ковачевски.
Виктор Андонов, советник за енергетика во кабинетот на Ковачевски, денеска на прес-конференција рече дека наскоро ќе бидат познати следните чекори што ќе ги преземе Владата.
– Адвокаткиот тим, кој е ангажиран од Владата и не застапува, а тоа е „Дехерт” од Франција, ја разгледува и ја анализира пресудата. По завршување на тој процес, заедно со Координативното тело кое е задолжено за арбитражните постапки, ќе ѝ предложат на Владата соодветни чекори што ќе се презмат во однос на објавувањето на пресудата – рече Андонов.
Со донесената пресуда, како што посочи тој, преполовен е износот на оштета што го барала грчката компанија.
– Вкупното оштетно побарување кон Република Северна Македонија, заедно со каматите за периодот 2008-2011 година, изнесуваат 42.646.000 евра. Согласно пресудата, оштетното побарување кое е пресудено од страна на Арбитражниот суд во Париз е за 50 проценти пониско од првичното барање, односно оштетното побарување пресудено од Судот изнесува 21.478.800 евра, што значи дека нашиот адвокатски тим се изборил за преполовување на бараниот износ – рече Андонов.
Грчките и француските медиуми објавија дека Арбитражниот суд во Париз пресудил во корист на грчката компанија и дека Северна Македонија ќе треба да плати оштета од околу 25,5 милиони евра.
Станува збор за процес во кој Република Северна Македонија е тужена страна поради непочитување на обврските произлезени од купопродажниот договор на рафинеријата ОКТА случен во 1999 година.
