Предлогот за нормализација на односите претставува можност за народите на Србија и Косово да ја подобрат безбедноста и стабилноста на поширокиот регион на Западен Балкан, изјавија од американскиот Стејт департмент за Радио Слободна Европа (РСЕ).
„Прифаќањето на овој договор ќе помогне во унапредувањето на нашите клучни цели за регионот на Западен Балкан, вклучително и донесување мир, стабилност и просперитет за сите народи во регионот“, јави денешната реакција на Стејт департментот РСЕ.
Се очекува претседателот на Србија, Александар Вучиќ и премиерот на Косово, Аљбин Курти на денешната средба пред посредниците на Европската унија да потврдат дека го прифаќаат европскиот план.
„Важно е двете страни да ги искористат овие разговори за да ја покажат својата посветеност за мирна иднина на регионот. Преку дијалог Србија и Косово треба да постигнат сеопфатен договор“, соопшти Стејт департментот.
„Нашето очекување е двајцата лидери да пристапат на овие состаноци со конструктивен дух потребен за да се продолжи со предлогот“, се вели во соопштението.
Таканаречениот француско-германски план, кој е поддржан и од САД, засега не е достапен за јавноста, а партиите го добија есента минатата година.
Европските претставници најавија дека ќе го објават доколку партиите потврдат дека го прифаќаат.
Радио Слободна Европа во декември минатата година ја објави содржината на планот од десет точки, кој предвидува еднакви права за Србија и Косово, почитување на територијалниот интегритет и неповредливост на границите, признавање на државните симболи и отворање на дипломатски претставништва на Србија. и Косово во седиштата на соодветните влади.
Во планот не се споменува можноста за членство на Косово во Обединетите нации, но експлицитно е наведено дека Србија нема да се противи на членството на Косово во ниту една меѓународна организација.
Прашањето за формирање на Заедница на општини со српско мнозинство на Косово, иако не со тоа име, се споменува во смисла на „посебни аранжмани за српската заедница на Косово“.
Предвидено е да се формализира статусот на Српската православна црква (СПЦ) на Косово и да се обезбеди силно ниво на заштита на српското верско и културно наследство и верски објекти, во согласност со постоечките европски модели.
„И Косово и Србија треба да ги спроведат договорите што веќе ги потпишаа преку процесот на дијалог, вклучително и напредок кон формирање Заедница на општини со српско мнозинство. Силно ги охрабруваме косовските Срби да се вратат во косовските институции што е можно поскоро со цел да се подобри безбедноста и стабилноста за сите граѓани“, заклучува Стејт департментот.
