Синоќа во Украина пристигнаа сателитски антени на „Старлинк“, кои на Украинците ќе им овозможат пристап до Интернет доколку руските сили ја уништат нивната интернет инфраструктура.
Илон Маск претходно најави дека неговата компанија „SpaceX“ ќе испрати помош во Украина.
Овие сателитски антени пристигнаа доцна синоќа.
Украинскиот министер за дигитална технологија Михаило Федоров ја објави оваа вест на својот Твитер профил.
Фотографијата што ја сподели покажува приколка за камион во која има кутии со кориснички терминали за поврзување со сателити, држач за монтирање и емитер на Wi-Fi.
Во описот на фотографијата, Федоров му се заблагодари на Маск за помошта.
– Нема на што – одговори Маск.
