Додека беснее конфликтот меѓу Израел и палестинското движење Хамас во Појасот Газа, прва дама на Турција, Емине Ердоган изјави за Newsweek дека нејзината земја ги води напорите за носење хуманитарна помош на опколената територија и бара итен прекин на огнот.
Општествената активистка и сопруга на Реџеп Таип Ердоган, кој беше реизбран во мај за претседател на една од најмоќните и највлијателните нации на Блискиот Исток, Емине Ердоган лично интервенираше во конфликтот во Газа, додека хуманитарната криза во оваа енклава рапидно расте. Минатата недела таа претседаваше со самитот „Обединети за мир во Палестина“ во Истанбул во обид да ја зајакне меѓународната солидарност и соработка по ова прашање
Таа објасни за Newsweek зошто Турција, врши поголем притисок врз Израел, кој негираше какво било прекршување на меѓународното право во борбата против Хамас по нападот на 7 октомври, и зошто верува дека нациите ширум светот, вклучително и и другите сојузници во НАТО, САД, мора да истапат напред.
-Денес, како резултат на израелските напади на окупираните палестински територии, а особено на Газа, сведоци сме на грозоморните последици што војната може да ги има врз жените и децата. Додека Израел има невиден налет со бомби и куршуми врз цивилите во Палестина, нашата колективна реакција е крајно застрашувачка и вознемирувачка.
Жените и децата сочинуваат 73% од околу 12.300 убиени Палестинци до денес. Какво валидно оправдување може да има државата за да ја претвори површината на градот во пекол за сите живи суштества, а подземјето во некропола за децата? Ова не е моја дефиниција; ова го изјавија генералниот секретар на ОН, Антонио Гутереш и портпаролот на УНИЦЕФ Џејмс Елдер. Денеска на секој час во Газа гинат по пет деца, а по седум бебиња се раѓаат меѓу бомбите – истакнува првата дама на Турција во интервјуто за Newsweek.
– Секое дете има право на безбеден и удобен дом, како и на добро образование и здравствена заштита, без разлика каде е родено. Во однос на пристапот до правата и можностите, не гледаме никаква разлика меѓу палестинските деца и децата од Украина, Европа, Америка, Турција или други нации – истакна Емине Ердоган.
За време на овој конфликт, многумина во исламскиот свет ги обвинија муслиманските земји дека не прават доволно за да ги поддржат хуманитарните потреби на жителите на Газа. Турција се обидува да ги ублажи страдањата на тамошните Палестинци во што активно е вклучена и сопругата на турскиот претседател.
– Ова што се случува сега во Газа не може ни да се опише како војна. Со својата најсовремена технологија и оружје, ова е држава која реагира со организациски рефлекси и следи начин на колективно казнување без дискриминација меѓу мажите и жените, децата и постарите. Велам организациски рефлекс затоа што и во време на војна постои закон што го следат цивилизираните држави. Меѓутоа, гледаме дека Израел ги игнорира дури и најосновните правила на меѓународното право во Палестина, како што се недискриминацијата, употреба на пропорционална сила и забрана за употреба на хемиско и биолошко оружје.
Во моментов во Палестина, завојуваната држава јасно врши воени злосторства, кои се еднакви на злосторства против човештвото, што ги прекршува универзалните хуманитарни вредности и меѓународното право. Не можеме да ги сметаме таквите злосторства како проблем што ги засега само Палестина, регионот или муслиманските земји. Во обид да се спречи повторување на слични страдања, загуби и трагедии, се забранува и се ограничува и се регулираат правните акти кои се дозволени во време на војна. Всушност, Израел ја таргетира оваа заедничка акумулација на вредности и закони со секоја фрлена бомба во Газа, нанесувајќи и неповратни рани на глобалната совест. Во такво сценарио, императив е да се прашаат петте постојани членки на Советот за безбедност на Обединетите нации, претставниците на ОН и западните земји кои тврдат дека се бранители на глобалните вредности: Што чекате? Зошто да не се обезбеди прекин на огнот, итна испорака на хуманитарна помош во регионот и крај на кризата која ја загрозува глобалната безбедност?- повика Емине Ердоган.
Сопругата на турскиот претседател посочува дека оружената офанзива на Израел врз Газа предизвикала штети во најгусто населената област во светот како да се фрлени две атомски бомби.
– За само 40 дена, повеќе од 25.000 тони бомби беа фрлени врз Газа, град со 2,5 милиони жители распространет на 365 квадратни километри и дом на најгусто населената област во светот. Тоа вклучува фрлање експлозиви еднакви на две атомски бомби во мала, но густо населена област како Газа – посочува Емине Ердоган.
Таа истакнува дека намерите на Израел не се мирно решавање на конфликтот туку воени придобивки и обид да ги раселат Палестинците и да ја присвојат нивната територија.
– Ако намерата на Израел не е насилно да ги премести Палестинците од Газа, а потоа да ја заземе нивната земја, туку мирно да коегзистира со Палестинците во согласност со резолуциите на ОН и постоечките договори, тогаш неговата посветеност за зачувување на палестинските права требаше да го надмине непријателството кон Хамас. За жал, забелешките на високи функционери, нападите засновани на лажни обвиненија и воените злосторства што тие веќе ги извршиле, покажуваат дека Израел е повеќе заинтересиран за војна, конфликт и политички и воени придобивки што тие веруваат дека ќе им ги донесе, отколку за мир.Сега треба да ја прашаме глобалната заедница: каде човештвото ја повлекува линијата? Кој критичен праг на смрт го чекате за да се стави крај на ова злосторство? Соочена со нападите кои траат со недели, глобалната заедница заглушувачки молчи – упати критика првата дама на Турција потсетувајќи на пораката од самитот „Обединети за мир во Палестина“ испратена до целиот свет – Нема победници во војната и нема губитници во праведен мир“.
