Украинските сили соборија 17 руски беспилотни летала на југот на украинската област Одеса, а оштетени се згради во областа на пристанишниот град Измаил, соопшти денеска локалниот гувернер.
„Нашите сили за воздушна одбрана соборија 17 беспилотни летала… магацини и производствени згради, земјоделски машини и опрема на индустриски компании беа оштетени во неколку населби во областа Измаил“, изјави гувернерот Олег Кипер преку Телеграма.
Тој додаде дека по соборувањето на беспилотните летала на таа територија избувнале неколку пожари и дека тие се изгаснати.
Според гувернерот, нападот траел три и пол часа и немало жртви или повредени.
Оперативната команда на југот на Украина соопшти дека се работи за голем ноќен напад извршен со беспилотни летала против цивилна инфраструктура во реонот на Дунав.
Речното пристаниште Измаил стана една од главните патишта за транспорт на украински земјоделски производи откако Москва го раскина договорот за извоз на жито во јули.
Во ноќта меѓу саботата кон неделата руски беспилотни летала погодија индустриски локации на Дунав, соопштија од Украинското обвинителство. Руската армија соопшти дека извршила напад на пристаништето Рени, исто така во областа Одеса.
Руско Министерство: Уништени четири украински воени глисери во Црното Море
Руското Министерство за одбрана соопшти дека поморската авијација уништила четири брзи воени бродови со украински војници во Црното Море.
„Вечерва, во северозападниот дел на Црното Море, поморската авијација на Црноморската флота уништи четири брзи воени бродови „Вилард Си Форс“, од американско производство, кои превезуваат десантни групи на украинските вооружени сили“, соопшти Министерството. преку Телеграма.
Во соопштението се наведува дека се уништени четири брода со до 50 припадници на украинските специјални сили.
Според руското Министерство, украинските бродови пловеле во правец на Кејп Тарханкут, западно од анектираниот полуостров Крим.
Москва објави и дека соборила украинско беспилотно летало во близина на Крим и друго во руската област Курск, која граничи со Украина.
Претходно, на 24 август, Украина објави дека извршила операција на специјалните сили на полуостровот Крим, кој беше анектиран од Русија во 2014 година, и дека таму го подигнала државното знаме.
Украинските специјални сили потоа пристигнаа од правец на морето и слетаа на западниот дел на полуостровот, без да претрпат никакви загуби, се наведува во соопштението за печатот на украинската разузнавачка служба.
