Маја Мурму носела вода во селото Раипал во источна Индија кога била нападната и прегазена од слон. Несреќната жена од здобиените повреди подоцна починала во локалната болница.
– Извештаите велат дека кога членовите на семејството се собрале на погребот истата вечер, слонот се вратил, го извлекол трупот на жената од погребната клада, го фрлил на земја и повторно го згазил пред да побегне – пренесува „Индипендент“. Ожалостените шокирани ја гледале непријатната сцена.
Според властите, слонот залутал од засолништето за диви животни во Далма. Семејството можело да продолжи со церемонијата само откако слонот си заминал. Останува нејасно дали животното повредило некој друг присутен.
Секоја година во Индија, слоновите убиваат околу 100 луѓе, иако тој број може да достигне и до 300, според Светскиот фонд за природа. Индиската влада се обидува да спречи вакви инциденти ставајќи радио јаки на слоновите и ги предупредува локалните жители преку СМС пораки доколку животните се појават во населени места.
