Слободан Бркиќ е слеп 35-годишен полиглот, експерт за кибербезбедност на ФБИ во САД и православен мисионер кој на своја сметка преобратил 9.500 странци во православие, од кои, 300 се Јапонци.
– Сѐ што се случува има причина. И тоа што речиси 500 години бевме под Турците само нѐ направи посилни. Но, српската слога недостасува. Кога сме на работ на колапс, се обединуваме и му покажуваме на непријателот дека никој не ни може ништо нам сложните – вели Слободан Бркиќ, пишува Мондо.
Од трите бебиња, две ослепеле
Слободан е необичен Србин. Станува порано од другите. Всушност, спие 2 часа на ден, јаде еднаш, веган е, а на компјутер го минува останатото време. Освен кога пее духовна музика со сестрите Вера и Нада во хорот на црквите „Св. Марко“ и „Св. Габриел“.
– Ние сме родени како тројка во декември 1989 година во Белград. Од нас тројца, двајца ослепевме поради вишокот кислород во инкубаторот. За другите е невообичаено, но тоа ми е предност. Ако можев да го вратам времето и да си го режирам животот место Бога, повторно би го избрал истото – вели Бркиќ.
А тој објаснува и зошто не сака да прогледа.
– Задоволен сум од мојот живот. Изгубив едно чувство, но добив многу повеќе. Ако тоа не се случеше, веројатно ќе бев просечен и обичен човек кој се занимава со просечни работи. Не ќе научев 10 јазици, не ќе се занимавав со кибербезбедност и не ќе запознаев толку прекрасни луѓе – вели Слободан.
Слободан говори 10 јазици меѓу кои и англиски, француски, германски, јапонски, шпански, италијански, старогрчки и латински. Вели дека неговите јазици ја отвориле вратата на знаењето преку која влегол со внатрешното око. Бркиќ честопати проповеда во манастирите во Србија и во светот.
– Во голема мера си го заслуживме она што ни се случува сега кога сме во опасност да ни го грабнат Косово. Додека не изгубиме нешто, не знаеме колку ни значи и веќе не го цениме – вели Бркиќ.
Патувал низ целиот свет и го видел со внатрешното око. Честопати е во Америка каде работи во одделот за кибербезбедност на ФБИ.
– Сега сум таму секоја година по неколку месеци, а со сестра ми првпат отидов во Бостон кога бев дете каде што ги направивме првите операции на очите. И ја видов Америка. Можев да ја почувствувам енергијата на секој човек поединечно – тие не се лоши луѓе. Кога човекот гледа само со физичка визија, тој е ограничен бидејќи очите измачуваат. Гледам со духовна визија која е непроменлива. Затоа, во светото писмо се вели: „Благословени се оние кои не виделе и сѐ уште веруваат“ – објаснува Бркиќ.
Особено ги почитува Јапонците
Деноноќно на компјутер им дава часови по јазик на луѓето низ целата Земја. Тој ги почитува сите, но особено Србите и Јапонците.
– Мојот најдобар пријател од Јапонија се вика Јамамото, има 115 години и летово ќе дојде тука. Тој бил војник во Втората светска војна, а и учествувал во нападот на Перл Харбор. Бил и во Окинава. Ние сме како двајца родени браќа. Секој ден трча по 10 километри. Живее сам. Неговиот внук почина пред 3 години на 68 години – вели Слободан.
Според Бркиќ, Јапонците го почитуваат православието, а во Токио има православна црква наречена „Николај До“, според мисионерот кој преобратил во православие многу поданици на царството.
Три вида хакери
Бркиќ говори за неговата „главна професија“ како експерт за киберосигурување.
– Уште како дете ме интересирале компјутери и информатичка технологија, но тоа тогаш не беше толку достапно. Студирав самоук… Колку компјутери сум уништил тешејќи се дека човек учи додека е жив. Се занимавам со создавање антивирусни програми, веб-страници, бази на податоци и системска одбрана од хакерски напади. Секогаш има клиенти – рече Бркиќ.
Во ИТ одделот на ФБИ, Бркиќ работи на заштита од хакери. Тој објаснува дека постојат 3 вида хакери кои напаѓаат.
– Првите се професионалци кои работат за својата влада, за нивната земја, а цел им е да украдат информации или да им наштетат на другите. Друг вид хакери се т.н. хакери-криминалци. Работат исклучиво за пари. Третиот и најлош вид е групата хакери фанатици. Тие се оние кои хакираат поради убедување, верување и религија. Не им е гајле дали жртвите на хакот се Американци, Руси или Кинези – објасни Бркиќ.
Според Слободан, Господ го избира најдоброто за нас, па затоа тој вели дека не може да си замисли живот поинаков од сегашниот.
