Силен земјотрес со јачина од 7,2 степени според Рихтеровата скала го погоди брегот на јужниот дел на Перу во текот на ноќта во петокот, на длабочина од 28 километри (17 милји), според Геолошкиот институт на САД (USGC).
Тихоокеанскиот центар за предупредување за цунами (PWTC) издаде предупредување за „можни“ бранови од цунами кои достигнуваат висина од 1 до 3 метри, јавува CNN.
„Врз основа на сите достапни податоци, за некои брегови се предвидуваат опасни бранови од цунами“, соопшти центарот.
PWTC соопшти дека нема закана од цунами за американскиот Западен брег.
Земјотресот се случи на осум километри западно од Атикипа, на околу 600 километри јужно од главниот град Лима.
Некои жители на Атикипа на социјалните мрежи рекоа дека почувствувале многу силен и долг потрес кој ги потресе нивните кревети. Земјотресот бил почувствуван до главниот град.
Перу и поголемиот дел од брегот на Тихиот Океан на Јужна Америка се наоѓаат на границата на две тектонски плочи: јужноамериканската плоча, која го вклучува најголемиот дел од континентот и плочата Наска, која се протега низ Тихиот Океан долж поголемиот дел од брегот.
