По седницата на раководството на СОНК, првиот синдикалец Јаким Неделков изјави дека понудата за зголемување на платата од 12 проценти од страна на владата е одбиена и дека штрајкот кај вработените во основните и средните училишта продолжува, додека во мирување е ставен кај вработените во градинките.
– Нашите членови во текот на денешниот ден се изјаснуваше во однос на предлозите на владата и можам да кажам од сумираните резултати дека од вкупно 480 синдикални организации кои дадоа податоци за нивното изјаснување, 388 беа за продолжување на штрајкот, а само 83 беа за прекинување на штрајкот – рече Неделков.
Тој потенцираше дека најголемиот дел од оние коишто се прекинување на штрајкот се синдикалните организации од детската заштита, а без исклучок огромниот број за продолжување на штрајкот се од основните и средните училишта.
– Според резултатите советот на СОНК донесе одлука дека штрајкот во основните и средините училишта продолжува и утре се до наоѓање на заедничко прифатливо решение помеѓу синдикатот и владата. За во градинките е донесена одлука штрајкот да биде ставен во мирување и од утре тие да започнат да работат со ист интензитет како и претходно – истакна претседателот.
Советот на СОНК по сумирањето на резултатите и поради незадоволството од понудениот предлог, донело одлука да се организира голем масовен протест пред владата на Македонија, а кој треба да се одржи на 4 мај (среда).
