Српскиот тенисер Новак Ѓоковиќ утрово бил опериран во Париз, објавија француските и италијанските медиуми. Ѓоковиќ во вторникот се повлече од Ролан Гарос поради кинење на медијалниот менискус на десното колено и многу брзо донесе тешка одлука да оди „под нож“ заедно со лекарите и неговиот тим.
Причината поради која Ѓоковиќ мораше брзо да донесе одлука е тоа што му претстои најважниот дел од сезоната за кој зборува од почетокот на годината. Ѓоковиќ сака да ѝ донесе злато на Србија од Олимписките игри во Париз и затоа веднаш решил да го оперира коленото и според првите информации ќе отсуствува најмалку три недели. Воедно тоа значи дека Ѓоковиќ ќе го „жртвува“ Вимблдон и многу мали се шансите да игра на овој турнир.
Што се однесува до датумот, вреди да се истакне дека Вимблдон е на програмата од 1 јули, а дури и да се опорави Ѓоковиќ – прашање е дали би играл затоа што би морал да се „префрли“ на трева. Тоа можеби не е најдобро за неговото колено, но и за играта бидејќи се „намести“ токму за земјена подлога, на која ќе се игра тенис на Олимписките игри од 27 јули до 4 август.
„Многу сум тажен што можам да соопштам дека се повлекувам од Ролан Гарос. Играв со сето мое срце и го дадов максимумот на вчерашниот натпревар, но за жал поради кинење на медијалниот менискус на десното колено – донесов тешка одлука заедно со тимот. На сите им посакувам многу среќа во текот на оваа недела, а исто така искрено им благодарам на навивачите за нивната љубов и поддршка“, напиша српскиот тенисер по повлекувањето од Ролан Гарос.
Поради повлекувањето од Ролан Гарос, Ноле загуби 1.600 поени и од понеделник повеќе нема да биде тенисер број еден во светот бидејќи сега беше престигнат од Јаник Синер, новиот број еден. Дополнително, доколку Ѓоковиќ не се појави на Вимблдон, ќе загуби уште 1.200 бода бидејќи го „брани“ финалето од лани, а може да се случи на Олимписките игри да оди само како трет носител.
Да потсетиме, Новак Ѓоковиќ се повреди на мечот против Музети поради катастрофалната организација на турнирот, бидејќи не само што играше до три часот наутро, туку беше послушан за неговите критики за огромната количина земјена подлога на теренот.
