Според календарот за работа во образованието, до крајот на второто полугодие треба да се одработат 180 наставни денови, изјави министерот за образование и наука Јетон Шаќири одговарајќи на новинарско прашање дали е точно дека поради одложениот почеток на второто полугодие учебната година ќе заврши на 14. наместо на 9. јуни.
На владина седница минатата недела беше одлучено наместо на 18. јануари второто полугодие да почне на 23. јануари, а Шаќири денеска образложи дека причина за одложениот почеток е подобро функционирање на наставниот процес.
– За подобро функционирање на процесот, поради тоа што 18. јануари е среда, 19. е празник за поголем дел од граѓаните и 20. е петок, одлучивме второто полугодие да почне в понеделник. Исто така, да се изработат сите 180 работни денови до крајот на ова второ полугодие. Што значи дека иако, освен 10. има три работни наставни денови, не гледам причина да има некаков проблем – рече Шаќири одговарајќи на новинарско прашање.
