Северна Кореја истрела најмалку една балистичка ракета, објави јужнокорејската војска, пред заедничките воени вежби на САД и Јужна Кореја, кои треба да се одржат следната недела.
„Северна Кореја истрела неидентификувана балистичка ракета кон Источното Море“, соопшти Генералштабот на Јужна Кореја, користејќи го името Јапонско Море.
Јапонија исто така потврди дека Северна Кореја истрелала проектил. Јапонското Министерство за одбрана соопшти дека Пјонгјанг „најверојатно лансирал балистичка ракета“, без дополнителни детали.
Ова се случува во време кога САД и Јужна Кореја подготвуваат симулациски вежби следната недела во Вашингтон и разговараат за мерките што треба да се преземат во случај Пјонгјанг да употреби нуклеарно оружје. Северна Кореја вчера се закани дека ќе одговори со „невидени“ контрамерки на идните американско-јужнокорејски маневри, сметајќи ги за подготовка за вооружен конфликт.
Доколку Вашингтон и Сеул ги изведат овие вежби, „ќе бидат соочени со контрамерки… силни и без претседател“, се наведува во соопштението на портпаролот на севернокорејското Министерство за надворешни работи.
Јужнокорејскиот претседател Џун Сук Јеол, кој ја презеде функцијата во мај 2022 година со ветување дека ќе заземе цврст став кон Пјонгјанг, го зголеми бројот на заеднички воени вежби со САД. Тие беа значително намалени за време на пандемијата на коронавирус.
