Сексуално преносливите болести се во пораст низ Европа. Зголемувањето на случаите на сифилис и гонореја е особено изненадувачки, покажуваат податоците објавени во понеделникот од Европскиот центар за превенција и контрола на болести (ECDC).
Имаше речиси 100.000 потврдени случаи на гонореја во Европа во 2023 година, што претставува зголемување за 31 отсто во споредба со претходната година и повеќе од 300 отсто во споредба со 2014 година. Ова е исто така највисоката регистрирана стапка на болеста во Европа откако ECDC почна да ги следи сексуално преносливите болести во 2009 година.
Ова зголемување е забележано кај различни возрасни и демографски групи, вклучително и мажи кои имаат секс со мажи и хетеросексуални мажи и жени. Највисоки стапки кај жените се во возрасната група од 20 до 24 години, што е и групата со најголем пораст во 2023 година (46%). Кај мажите, највисоки стапки се забележани во возрасната група од 25 до 34 години. Ако не се лекува, гонорејата може да доведе до значителни здравствени проблеми, како што се пелвична инфламаторна болест и неплодност кај мажите и жените.
Агенцијата, исто така, предупреди на зголемената закана од антимикробна отпорност кај гонореја, со појава на соеви отпорни на лекови кои ги прават сегашните третмани помалку ефикасни.
Се зголемува и бројот на случаи на сифилис. Во Европа имало 40.000 потврдени случаи во 2023 година, што е за 13 отсто зголемување во споредба со 2022 година и 100 отсто зголемување во однос на 2014 година.
Сифилисот е почест кај мажите. Највисоки стапки се забележани кај мажите на возраст од 25 до 34 години. Поголемиот дел од случаите на сифилис (72%) биле забележани кај хомосексуалци. Сепак, во споредба со 2022 година, стапките на сифилис се зголемија кај жените од сите возрасти. Нелекуваниот сифилис може да предизвика долготрајни компликации на срцето и нервниот систем, а ако бремената жена има нетретиран сифилис, бебето може да претрпи тешки компликации.
И покрај забавувањето на зголемувањето на извештаите за кламидија во 2023 година, таа останува најчесто пријавувана бактериска сексуално пренослива болест во Европа. Во 2023 година, имало повеќе од 230.000 пријавени случаи, што е зголемување од 13 отсто во споредба со 2014 година. Инфекцијата продолжува несразмерно да ги погодува младите луѓе, со највисоки стапки кај жените на возраст од 20 до 24 години.
Новите податоци го потврдуваат нагорниот тренд веќе забележан во 2022 година, кога случаите на гонореја и сифилис се зголемија за 48 отсто, односно 34 отсто, во споредба со претходната година.
Постојат неколку хипотези зошто се зголемени случаите на сексуално преносливи болести. Дел од зголемувањето се должи на повеќе тестирања, но промените во сексуалното ризично однесување, како што е помалата употреба на кондоми, исто така би можеле да играат улога во трендот, пренесува Дневник.хр.
Светската здравствена организација (СЗО) за Европа минатата година алармираше поради падот на употребата на кондоми меѓу тинејџерите во Европа, што го зголемува ризикот од сексуално преносливи инфекции и несакана бременост.
ЕЦДЦ рече дека наодите ја нагласуваат „итната потреба за зголемена јавна свест, напори за превенција, тестирање и третман за да се реши овој растечки јавно здравствен проблем“.
