Седумчлено семејство од Сирија, родители и пет деца загинаа во пожар што ја зафати куќата во Турција, каде што престојуваа откако го преживеаја минатонеделниот земјотрес, јавуваат локалните медиуми.
Турската државна агенција Анадолија, повикувајќи се на писмено соопштение на главниот јавен обвинител на Коња, објави дека овој петок избувнал пожар во еднокатна куќа во која живееле 14 лица. Седум лица повредени во инцидентот се на болничко лекување, се вели во соопштението на Ал Џезира.
Анадолија пишува и дека семејството што загинало пред само неколку дена се преселило во централниот регион на Коња од градот Нурдаги во југоисточна Турција во провинцијата Газиантеп, кој беше тешко погоден од земјотресот на 6 февруари.
Во соопштението се наведува дека на лице место се извршени потребните истраги, како и дека е назначена комисија од експерти.
– Го видовме пожарот, но не можевме да интервенираме. Девојчето беше спасено од прозорецот – изјави жителот Мухсин Чакир за Анадолија.
Петте деца кои загинаа биле на возраст меѓу четири и 13 години, јавува Анадолија.
Во Турција живеат околу четири милиони Сиријци.
