Најмалку седум лица загинаа во новите судири меѓу перуанската армија и поддржувачите на соборениот претседател Педро Кастиљо. Веќе во понеделникот протестите однесоа два животи. Во меѓувреме, перуанскиот Врховен суд му го продолжи притворот на соборениот претседател Кастиљо за 18 месеци.
Најмалку седум лица загинаа во новите судири меѓу перуанската армија и поддржувачите на соборениот претседател Педро Кастиљо во градот Ајакучо во четвртокот, соопштија локалните здравствени власти. Веќе во понеделникот две лица загинаа за време на протестите.
Во меѓувреме, перуанскиот Врховен суд нареди Кастиљо да остане во притвор уште 18 месеци, пренесува француската новинска агенција АФП.
Судири во различни делови на градот
Според Регионалниот здравствен центар во Ајакучо, во различни делови на градот избувнале нови судири, а наводно биле повредени повеќе од 300 луѓе. Полицијата тврди дека повеќе од половина од повредените се полицајци.
Вкупно 15 лица загинаа досега во немирите што избија по апсењето на Кастиљо минатата недела, според Министерството за здравство на Перу.
Кастиљо, левичар, минатата недела се обиде да го распушти парламентот контролиран од десничарските политичари, но Конгресот потоа го собори и војската и полицијата не застанаа на негова страна.
По неговото апсење, на почетокот било мирно, но потоа неговите приврзаници се разбудиле и започнале немири низ земјата. Затоа, перуанскиот министер за одбрана Алберт Отарола во средата воведе 30-дневна вонредна состојба низ целата земја.Противниците на Кастиљо го обвинуваат за бунт против државата и за заговор. Доколку биде прогласен за виновен, му се заканува затворска казна до 10 години, според државниот обвинител Алсидес Дијаз. Врховниот суд во четвртокот му го продолжи притворот за 18 месеци, поради стравувањата дека тој може да ја напушти земјата. Пред тоа, тој се обидел да поднесе барање за азил во мексиканската амбасада во Лима, наведува АФП.
Смирување на демонстрантите со ветувања за избори
Потпретседателката на Перу Дина Болуарте, која ја презеде функцијата по соборувањето на Кастиљо, се обидува да ги смири демонстрантите со ветувања за нови избори, за кои во средата по втор пат го скрати рокот, овој пат до декември 2023 година.
Нови избори се едно од главните барања на демонстрантите кои се залагаат за Кастиљо, во кои се вклучени и домородното население од регионите на Амазон во централен и југоисточен Перу. Сепак, тие не се убедени во ветувањата на потпретседателот, бидејќи бараат итно ослободување на Кастиљо и распишување предвремени избори.
