Само еден човек знае каде е телото на Данка, пишува српски Мондо во сопствена анализа на досегашните случувања со убиеното девојче во Србија по кое се трага повеќе од еден месец.
Како што е познато, постои сомневање дека само едно лице знае каде е телото на девојчето, а тоа е Раде Драгијевиќ, таткото на Дејан Драгијевиќ, кој признал дека ја убил.
„(Таткото на Дејан) покажува највисоко ниво на интелигенција и лукавство. Набргу откако беше уапсен, го смени адвокатот и се чини дека мисли само на својата одбрана. Затоа се сомнева дека тој е клучот за пронаоѓање на телото на девојчето, вели еден извор“, пишува Мондо.
Досега се сослушани 17 сведоци.
„Обвинителството нареди и вештачење на ГПС уредот од службеното возило на ПУК „Водовод“ за да се утврди рутата на движење на наведеното возило за критичниот период“, соопшти ВЈТ „Зајечар“.
Како што пренесува српски Информер, од Вишото јавно обвинителство во Зајечар ја потврдиле информацијата која се појави во некои медиуми, дека новите вештачења на ДНК кои пристигнале во обвинителството не покажуваат дека има биолошки траги од убиеното девојче Данка Илиќ (2) од Бор.
Станува збор за ДНК вештачењето од над 400, од вкупно 500 траги, земени од возилото на ЈКП „Водовод“ кое, како што се сомнева, го користеле осомничените Дејан Драгијевиќ и Срѓан Јанковиќ при кривичното дело.
– Во досега добиените резултати од вештачењето, нема биолошки совпаѓања со ДНК на девојчето. Сепак, важно е да се напомене дека ова е само дел од вештачењето, бидејќи се вештачат многу предмети. Сега пристигнаа само првите неколку извештаи. Очекуваме да пристигнат и другите – потврди обвинителот Миодраг Цановиќ за Информер.
Покрај овој комплет од материјални траги, на Биолошкиот факултет во Белград, во тек се и вештачења на биолошки траги од алат од куќите на осомничените и други предмети пронајдени на терен.
Се истражуваат и околностите под кои починал Далибор, братот на осомничениот Дејан Драгијевиќ.
Данка Илиќ беше убиена на 26 март годинава. За тоа кривично дело се осомничени Дејан Драгијевиќ и Срѓан Јанковиќ. Тие се упатени на психијатриско вештачење во Специјалната затворска болница во Белград.
Братот на Дејан, Далибор Драгијевиќ е уапсен под сомнение дека му помогнал на својот брат да го отстрани телото на Данка Илиќ. По апсењето му е одреден притвор до 48 часа, по што починал во полициската станица во Бор.
Во притвор е и таткото на Дејан и Далибор, Раде Драгијевиќ.
Albanian
English
Macedonian
Turkish
