Американскиот претседател Џозеф Бајден го информираше Конгресот дека на 11 мај ќе ја прекине вонредната состојба во јавното здравство поради Ковид-19, додека повеќето земји во светот се вратија во нормален живот речиси три години по пријавените првите случаи на коронавирус.
Укинувањето на националните и јавно здравствените декларации за итни случаи формално ќе го промени одговорот на коронавирусот, кој ќе се третира како ендемска закана за јавното здравје.
Со оваа објава Бајден го изрази своето противење на резолуциите презентирани оваа недела од страна на републиканците во Претставничкиот дом за итно завршување на вонредната состојба. Републиканците исто така се подготвуваат да започнат истрага за одговорот на федералната влада на Ковид-19.
„Ненадејното завршување на итната состојба ќе создаде хаос и несигурност низ здравствениот систем, за државите, за болниците и лекарските ординации и што е најважно за десетици милиони Американци“, соопшти Канцеларијата за менаџмент и буџет на Белата куќа.
Поранешниот претседател Доналд Трамп првпат ја прогласи пандемијата „Ковид-19“ за национална вонредна состојба на 13 март 2020 година. Бајден постојано ја продолжуваше вонредната состојба откако ја презеде функцијата во јануари 2021 година, а таа ќе истече во наредните месеци.
Повеќе од 1,1 милион луѓе во САД починале од Ковид-19 од 2020 година, вклучително и околу 3.700 минатата недела, според Центрите за контрола и превенција на болести.
