Американскиот Си-Ен-Ен објави дека имал пристап до 53 документи протечени од Пентагон, кои се чини дека биле креирани помеѓу средината на февруари и почетокот на март, а во кои, меѓу другото, се наведува дека САД го шпионирале претседателот на Украина, Володимир Зеленски. . Според изворите, Украина морала да промени одредени воени планови по објавувањето на документите.
„Тоа не е изненадувачки“, рече извор близок до Зеленски, но истакна дека тие се загрижени за протекување податоци.
Сепак, Си-Ен-Ен објави дека украинските власти се длабоко фрустрирани од протекувањето.
Во извештајот на американското разузнавање се вели дека Зеленски кон крајот на февруари „предложил напад на руски локации во руската област Ростов“ со помош на беспилотни летала, бидејќи Украина нема оружје со долг дострел способно да испорача толку многу.
Разузнавачките информации би можеле да ја оправдаат позицијата на Вашингтон, кој не сака да ја снабдува Украина со ракетни системи со долг дострел, поради страв дека Киев би можел да ги искористи за напад на руска територија. Украинците, сепак, ветија дека нема да го сторат тоа.
Минатата недела во јавноста протекоа разузнавачки податоци на Пентагон, каде, според странските медиуми, наводно се гледа дека САД шпионирале, не само спротивставени земји, туку и сојузници.
По протекувањето документи, командата на вооружените сили на Украина мораше да промени одредени планови. Иако медиумите не објавија што точно е сменето, се верува дека измените се однесуваат на воздушните активности.
Одредени протечени документи наводно откриле слабости во воздушната одбрана на Украина и недостаток на муниција.
