Соединетите Американски Држави го испратија првиот пакет енергетска опрема во Украина во вредност од 13 милиони долари со цел зајакнување на енергетската инфраструктура на таа земја која е под засилени руски напади.Според најавите, САД имаат намера да испратат уште две пратки со помош од овој тип до крајот на оваа недела. Минатиот месец САД објавија дека ќе испратат енергетска опрема во Украина во вредност од 53 милиони долари.
Од октомври, руските напади се фокусирани на уништување на украинската мрежа за снабдување со електрична енергија и греење, а Киев и неговите сојузници сметаат дека таквата тактика е насочена кон нанесување штета на цивилите. Последните руски напади оставија милиони Украинци без струја и греење на температури под нулата.
„Русија намерно се обидува да ги убие Украинците со студ како што се приближува зимата. „Нашата стратегија во овој момент е да и помогнеме на Украина да се заштити од овие намерни напади врз енергетската инфраструктура што ја користат цивилите бидејќи може да се случи хуманитарна катастрофа“, рече висок американски функционер.
Украинската влада ги повика своите граѓани да штедат енергија.
